ABOUT US

Ka Soil & Water Conservation Department jong ka Meghalaya ka sdang kum ka Jhum Control Wing jong ka Forest Department hapoh ka jylla Assam mynshuwa. Hadien, la pynlong ia ka kum ka tnat bakyrpang ha ki snem 1959-60.

Kum kawei na ki Department baheh jong ka jylla, kane ka Department ka la pyrshang ban pynneh ia ki lai tylli ki khuiň mariang ba donkam - ka khyndew, ka um bad ki jingthung jingtep da kaba pyntrei ia shibun ki buit pynneh mariang.

Kine harum ki long ki jingthmu ba kongsan jong ka Department:-

Ban pynneh ia ka khyndew, ka um bad ki jingthung jingtep na ka bynta ka roi ka par kaba neh da ka jingthmu ban kyntiew ia ka ioh ka kot jong ki briew
Ban wanrah bad ban pyntreikam da ki buit stad jong ka juk ba mynta ia ka rukom rep shyrti ka ban pynneh bad pynbha ia ka mariang salonsar.
Kaba pyndonkam bad pynneh ia ka khyndew, ka um bad ki jingthung jingtep ha ki jaka kpait lum da kaba wanrah ia ki rukom trei ia ka khyndew katkum ka jinglah bad jinglong jong ka.

Da kane ka jingthmu, ka Soil & Water Conservation Department ka la shim ia ka lyngkor ban tem ia ka jingpynjulor ia ka mariang da kaba pyntrei ia ki prokram bapher jong ka na ka bynta ban wanrah ia ka jingpynmih bam kaba neh bad da kaba shim ia ki lad jingtrei ban wanrah ia ka jingdap biang ha kaba pynmih ia ki marbam.